الهبوط من الجنة الى ... الدوام =(

قصة سيدنا آدم - عليه السلام - تتكرر بحياتي كل سنة !
و التفاحة اللي اكلتها كانت قبل سبع سنين من الحين !
انتهى زمن المرح و الفرح و الأحلام الوردية و أتى زمن القعدة من النوم و "لوعة الجبد" !
انتهى الزمن اللي تنام فيه و محد يسألك ليش و جم ساعة نايم - لحظة خلوني اروح اييب كلنكس امش فيه دموعي !
باجر الدوام و المفروض حسب كلام الأهل اني شحنت طاقة حق االدراسة بس مع الأسف انتهى عمر بطاريتي الدراسية و مليت من الكتب و النوت و الأوراق التي راح تترس دبة السيارة ... ويع !
fact :
اكو ناس يملون من العطلة !
ليش مستغربين صج اكو ناس جذي و انا منهم !
يعني احس الفراغ ممل بس مع هذا ما كو شي "يضاهي" انك تقوم من النوم و ما عندك شي تسوي و ما كو مسؤولية و لا تحاتي تأخرت و لا تحاتي انك تبي تدرس اليوم شنو .

دائما انظر الى الجزء الممتليء من الكأس كما يقال و أنا معظم الأحيان أرى هذا الكأس متروس عالآخر !
صحيح أن الدوام ثقيل و يا كره "قعدة الصبح" و الامتحانات و الـ stress
بس شنو فايدة هالانسان و هو نايم ؟
اذا ما تعبت و ثابرت و اجتهدت و حاولت مرة و ما نجحت و ما استسلمت و بالأخير وصلت و أنجزت اذا أحد فينا ما مر بهذي التجربة ليش يعيش هالحياة ؟

ــــــــــــــــــــــــــــــــــــــــــــــــــــــــــــــــــــــــــــ

"لو تعلقت همة أحدكم في الثريا لنالها"
الرسول الأكرم محمد (ص)


"آفة النجح الكسل"
الامام علي بن أبي طالب (ع)


من لا يحب صعود الجبال
يعش أبد الدهر بين الحفر
أبو القاسم الشابي

الأرض للحشرات تزحف فوقها
و الجو للبازي و الشاهين
ايليا ابو ماضي